José María Rey Lourido

Este músico natural da parroquia de Portor (Negreira), deixounos como legado artístico unha interesante obra –ben valorada por diversos musicólogos, a quen se lles pediu a súa opinión sobre o tema–, en forma de partituras manuscritas. Varias delas son inéditas, e outras foran reproducidas en discos ou interpretadas por bandas e orquestras nas décadas centrais do século XX.
 
Despois da recuperación das melodías “Mi guajira” e “Punto cubano” –realizada polo profesor do IES Terra de Xallas, Modesto Refojo en 2007–, continúa agora con este labor de dar a coñecer a música de Rey Lourido o director da Banda de Música Ateneo de Negreira e da Escola Municipal de Música, Raúl Martín Niñerola, recentemente galardoado no ámbito galego pola obra da súa autoría titulada “A revolta Irmandiña”.

Raúl Martín está facendo unha labor de copista a partir desas partituras orixinais e creando uns arquivos de audio, por medios informáticos, para a súa difusión en Internet, a través dos sitios web Val de Barcala e Concello de Negreira, así como polas ondas de Radio Negreira.

Adianto

E tamén está a traballar con outras creacións de Rey Lourido, instrumentándoas para incluír no repertorio da Banda Ateneo e facer a súa estrea en vindeiros concertos desta entidade musical. A este respecto Martín Niñerola ten apuntado que “estas pezas poden soar moi ben na banda, porque non é música difícil de tocar, tampouco o é de instrumentar e é moi agradable ó oído”.
 
Como adianto desta tarefa, Raúl Martín ofrécenos a recuperación das composicións de Rey tituladas “Vila de Negreira” (vals) e “Negreira-Santiago” (pasodobre).

• Vila de Negreira PLAY
• Negreira-Santiago PLAY